අපගේ සේවාව ලබා ගන්නා හිතෛෂි මව්පියන් බොහෝ දෙනෙකු, නාමය සැකසීමට පෙර ඒ පිළිබඳ මා හා (නාම කතුවරයා හා) සාකච්ඡා කළ යුතු බව පවසයි. සැබවින්ම මව්පියන්ගේ ඉල්ලීම වචනයේ පරිසමාප්ත අර්ථයෙන්ම සාධාරණ බව පිළිගනිමි. එමනිසාම, මව්පියන්ගේ ඉල්ලීමද ඉටු කළ හැකි සාධාරණ මඟක් සිතුවෙමි.
මා යාවජීව වශයෙන්, බිළිඳු නාමකරණය හා ලේඛණ වෘත්තිය තුළම නියැලී සිටින්නෙකු බැවින්, සෑමවිටම නිහඞ සමාධිමත් මනසක් ඊට අවැසි කරයි. එහිදී දුරකථන නාදය / දුරකථන සංවාද යනු එම නිහඞ සමාධිමත් මනස බිඳ දමන්නකි. එමනිසාම, දුරකථනය අක්රිය කර තබන්නට බොහෝ විට මා හට සිදුවේ. එමනිසා, මව්පියන් හා දුරකථනයෙන් සාකච්ඡා කිරීමට ඇති මඟ ඇහැරී යයි. නමුත් අප දෙපාර්ශවය අතර සන්නිවේදනය, හුදු දුරකථන සංවාදයටම ලඝු විය යුතු නැතැයි සිතමි.
ලේඛණ කාර්යයේ නිරතව සිටින අතරතුර, ඔබ හා දුරකථනයෙන් සාකච්ඡා කිරීම, මා හට දුෂ්කර වුවද, ෆේස්බුක් පිළිසඳරක් (FB Chat) ඔස්සේ ඔබ හා සංවාදශීලී වීම, අසීරු කටයුත්තක් නොවේ. පරිගණකයේ යතුරු පුවරුව මත නිරන්තරයෙන් දුවන ඇඟිලි තුඩු ඔබ වෙනුවෙන් වැඩිපුර වෙහෙසවීම, ලේඛණ කාර්යයටද බාධාවක් නොවේ. එබැවින්, මා පෙන්වා දෙන කරුණ දෙස අවබෝධයෙන් හා කරුණාවෙන් බැලිය හැකි, හිතෛෂි මව්පියන්ට, තමන් කැමැති ඕනෑම වේලාවක, මා හා ෆේස්බුක් පිළිසඳරක් ඔස්සේ, තම දරුවාගේ නම සකස් කළ යුතු ආකාරය ගැන, අවශ්ය තරම් සාකච්ඡා කළ හැක. නාමය පිළිබඳ සියලු ඉල්ලීම්, සියලු දැනුවත්කිරීම් සෘජුවම මා වෙත ඉදිරිපත් කළ හැක.
නාමය සකස් කිරීමට පෙර, මව්පියන් සමඟ ඒ පිළිබඳ සාකච්ඡා කිරීම අත්යවශ්ය කරුණකි. මන්දයත්, එක් එක් මවිපියන් නාමය පිළිබඳ විවිධ අදහස් දරන හෙයිනි. එමනිසා මව්පියන්ගේ අදහස් විමසීමකින් තොරව සකසන නාමයන්, ඇතැම්විට මව්පියන්ගේ සිතුම් හා නොපෑහෙන අවස්ථා අප දැක ඇත. එයින් මව්පියන්ටද, නාමය හිමිවන දරුවාටද යම් හිංසාවක්, අසාධාරණයක් සිදුවන බව අමුතුවෙන් කිව යුතු නොවේ.
සන්නිවේදනය යනු සියලු ප්රශ්න විසඳා ගැනීමට ඇති පහසුම මඟයි. නාමය සැකසීම පිළිබඳ මව්පිය අදහස් හුවමාරුවට මෙතෙක් පැවැති බාධාව, ෆේස්බුක් පිළිසඳර ඔස්සේ සිදු කරන සජීව සංවාදය තුළින්, බොහෝ දුරට මඟ හැරී යනු ඇත.
කාර්යබහුල දිවි පෙවෙතක් ගත කරන මව්පියන්ටද, තම තමන්ගේ රාජකාරිවලට බාධාවක් නොවන පරිදි, දවසේ පහසු වෙලාවක, මා හා පිළිසඳරට එක්විය හැක. දවසෙන් වැඩි කාලයක්, පරිගණක තිරය අසළම ගෙවෙන නිසා, ඔබ හා සාකච්ඡාවට මා හට ද අමුතු කාලයක් වුවමනා නොවේ. (විශේෂ හේතුවකට බැහැර ගිය අවස්ථාවක හැර)
තම දරුවාටම වෙන් වූ, අනන්ය, දුර්ලභ, අර්ථවත් නාමයක් සොයා වෙහෙසෙන මව්පියන් හට, නාමය සැකසීමට පෙර, ෆේස්බුක් පිළිසඳර ඔස්සේ මොහොතක් මා හා සංවාදශීලිවීම, නිසැකවම, සිය අරමුණ මුදුන් පමුණුවා ගැනීමට අතිශයින් ඉවහල් වනු ඇත.
පහත සබැඳිය ඔස්සේ ඔබට, මාගේ ෆේස්බුක් ගිණුම හා සම්බන්ධ විය හැකි අතර, ඊට සම්බන්ධ වී, ඔබේ පණිවුඩය inbox කිරීමෙන්, සංවාදය ඇරඹිය හැක.
No comments:
Post a Comment